28.01.2025

Åtvarar mot ny aktivitet 

AF Miljøbase Vats

Fiskarlaget åtvarar mot å opne for utvida industriverksemd i Vats- og Yrkefjorden. Selskapet AF miljøbase Vats har nå søkt om å få lagre og setja saman endå fleire havvindturbinar i særs viktige fiskeområde.

Det er Sør-Norges Fiskarlag som har uttalt seg i saka, og saksansvarleg Eirin Kongestøl Espeland har også i tidlegare uttaler påpeika at fjorden er særs viktig for fiskerinæringa. 

Sør-Norges Fiskarlag sende den 13. mars i fjor uttale til varsel om oppstart av planarbeid og høyring av planprogram.  

Det er no på nytt understreka at: «Det er avgjerande at både areal og miljø blir ivareteke for framtidig berekraftig fiske i fjorden.» 

Ny aktivitet 

Det er som nemnt selskapet AF miljøbase Vats, som har planar om utviding av industriområdet i Yrkjefjorden. 

Før nyttår var det varsla planar om enda ei utviding mot aust i Yrkesfjorden, der tiltakshavar «ser behov for å sikre eit større areal i sjø til våtlagring av ferdigmonterte havvindturbinar og fundament til vindturbinar». 

 

Utsnitt av flyfoto frå 2021, som viser sitjenot innanfor planområdet i Yrkjefjorden.  Foto: Norgeibilder.no

Berekraftig fiske 

Sør-Norges Fiskarlag skriv at det er avgjerande at både areal og miljø blir ivareteke for framtidig berekraftig fiske i fjorden. 

I uttalen har Fiskarlaget også lagt ved flyfoto (bilete over) som stadfester at området blir brukt til fiske med sitjenøter og til låssetting av fangst.  

Det blir påpeika at eksakt plassering av sitjenøtene og lås kan variere frå år til år. Det har vore plassert opp mot fire sitjenøter langs land i Vindafjord kommune sitt sjøområde.  

Eirin Kongestøl Espeland skriv at dette er eit svært miljøvenleg fiskeri med minimalt med utslepp og drivstoffbruk. Det er også mange andre viktige fiskeri, med ulike reiskap og etter ulike artar, som foregår i dette området. 

 

Ber om dokumentasjon 

Sør-Norges Fiskarlag vurderer at lagring og samanstilling, samt anna aktivitet som reguleringsplanen kan legge opp til, ikkje er eigna i sjøområda i Vats- og Yrkesfjorden, då det vil gå på bekostning av etablert, lønsam, berekraftig og miljøvenleg fiskeriaktivitet i ein av våre aller viktigaste fiskefjordar. 

Sør-Norges Fiskarlag har i sin uttale peika på at påstandar om auka behov for våtlagring av vindturbinar og fundament derfor må dokumeterast  

– Etter vår vurdering vil behovet for slik mellomlagring av vindturbinar bli langt mindre enn forventa, og vi er tydelege på at det må kome både ein sakleg og realistisk dokumentasjon på desse påstandane, seier Kongestøl Espeland. 

I uttalen ber Sør-Norges Fiskarlag også om forsikringar om at eit eventuelt løyve til våtlagring av vindturbinar ikkje seinare skal kunne endrast til mellomlagring og opphogging av utrangerte petroleumsinstallasjonar. 

– Opphogging av slike installasjonar har allereie bidrege til at den kjemiske tilstanden i Yrkefjorden no er klassifisert som «dårleg», påpeikar Fiskarlaget i sin uttale. 

Uttale frå Sør-Norges Fiskarlag 9. januar 2025:

Uttale frå Sør-Norges Fiskarlag 13. mars 2024: